ليه محمد صلاح في ليڤربول..! | مجمع نيوز
اخر الاخبار
recent

ليه محمد صلاح في ليڤربول..!

ليه محمد صلاح في ليڤربول..!

ليه محمد صلاح في ليڤربول..!
محمد صلاح لاعب نادي ليڤربول الإنجليزي


خلونا نسأل شويه اسأله ونجاول عليها مع بعض عشان نقدر نعرف محمد صلاح ليه في ليڤربول..

س١: ليه ليڤربول عاوز صلاح؟

ج١: قبل ما تسأل السؤال ده لازم تعرف شويه ارقام عن محمد صلاح.

- محمد صلاح قام بعمل ٩٣ مراوغة فى ٦٥ مباراة بواقع ٥٢٢٦ دقيقة مشاركة بالدورى الايطالى بمعدل مراوغة كل ٥٦.٢ دقيقة.
- ١٣٦ فرصة فى موسمين بواقع ٥٢٢٦ دقيقة مشاركة بالدورى الإيطالى بمعدل فرصة كل ٣٨.٤٢ دقيقة و هو الاكبر رقما و نسبة لأى من لاعبى روما منذ قدوم صلاح.
- سجل ٢٩ هدف كأكثر لاعب سجل لروما فى الدورى الإيطالى منذ قدومه بالمساواة مع "دجيكو"، و صنع ١٧ هدف كأكثر لاعب صنع اهداف لروما فى الدورى الإيطالى منذ قدومه.

س٢: اصلا ليڤربول ما عندهوش مشاكل فى صناعة الفرص اللى بيحتل فيها المركز الثانى فى إنجلترا بعد توتنهام، ولا فى التهديف اللى بيحتلوا فيه المركز الثالث ب٧٨ هدف بعد توتنهام و تشيلسى، يبقى ايه لازمته بقى؟

ج٢: معاك حق .. بس اللى فات ده كله كانت ارقام مجردة بتوضح قد ايه صلاح لاعب سوبر، تعالالى بقى للأرقام اللى بتوضح ليه صلاح مناسب جدا علشان يضيف لليڤربول هجوميا.

•واحدة من أكبر مشاكل ليڤربول الهجومية الموسم اللى فات تحديدا كانت بتظهر قصاد الفرق اللى بتتكتل خلف الكرة اللى كانت بتطلب من لاعبى ليڤربول حدة فى التحركات و القرارات مكنتش موجودة بشكل كبير تحديدا لما بيغيب "مانى" و فى ظل الغياب الدائم للمهاجم الصريح المتميز فى ليڤربول، و بالتالى اقرا بقى الارقام دي مع العلم أن معدل إستحواذ ليڤربول على الكرة اكثر من روما بما لا يزيد عن ٣٪ و نسبة التمرير الصحيح لروما بتزيد عن ليڤربول تقريبا ١٪.

- ١٣ هدف من اصل ١٥ من داخل منطقة الجزاء بنسبة تقريبا ٨٦.٦٪ و هى نسبة قريبة جدا من نسبة أهدافه بشكل عام فى الدورى الإيطالى سواء مع ڤيرونتينا أو روما بحيث سجل مع الناديين ٣٥ هدف ٣٠ منهم من داخل المنطقة.
- ٢٧ فرصة من الـ ٧١ فرصة اللى عملهم صلاح الموسم ده فى الدورى الأيطالى من داخل منطقة الجزاء و هو الرقم الأكبر فى البطولة و ثالث اكبر رقم فى الدوريات الخمسة الكبرى بعد "سواريز" بـ ٢٩ فرصة و كل من "نيمار" و "هازارد" بـ ٢٨ فرصه.

الأرقام دي لو بتوضح حاجة من رأيي انها بتوضح ان صلاح قادر يلاقى المساحة لنفسة و لزمايلة حتى قصاد التكتل و اعتقد ان ده هيناسب ليڤربول جدا تحديدا مع إسلوب لعبهم اللى بيعتمد على الضغط العالى و اللى بيحتاج بشكل دائم لتحركات هجومية حادة بعد نجاح الضغط علشان تترجم لفرص و لأهداف.

•مش كده بس، صدق او لا تصدق فصلاح عنده خبرة فرقة ليڤربول محتاجاها
- صلاح لعب ٥١ ماتش بين تمهيدى دورى الأبطال ٨، ١٥ بدورى الابطال و ٢٨ فى الدورى الأوروبى سجل فيهم ١١ و صنع ١٠، و عدد المشاركات ده فى المسابقات الأوروبية هيخلى صلاح فى المركز الرابع كأكثر لاعبى ليڤربول خبرة فيها بعد ميلنر صاحب الـ ٧٣ مباراة و لوكاس صاحب الـ ٥٧ و لوڤرين صاحب الـ ٥٤، و طبعا ليڤربول هيبقى فى اشد الحاجة للخبرة ده فى مشاركته المرتقبة بدورى الابطال الموسم المقبل.
- صلاح كمان عنده خبرة دولية كبيرة جدا مع منتخبه الوطنى، سواء مع المنتخب الأوليمبى اللى شارك معاه فى أوليمبيات لندن أو مع المنتخب الاول اللى شارك معاهم فى ٥٢ مباراة بتخليه واحد من أكثر لاعبى المنتخب الحالى خبرة بعد الحضرى و احمد فتحى، كمان ده مسجل مع المنتخب ٢٩ هدف بتخليه فى المركز السادس فى قائمة الهدافين التاريخيين لمنتخب مصر، الشئ اللى هيخلى قدوم صلاح عامل جذب مهم لنادى عريق زى ليڤربول عربيا على الاقل اكثر ما هو مشهور عربيا اصلا، لأنه يمكن اللاعب الأهم فى أحد أقوى المنتخبات العربية و الأفريقية و اوسعها شعبية.

س٣: طيب صلاح بيلعب يمين و مانى بيلعب فى ليڤربول يمين، و ما تقوليش مانى يقعد و اكيد ليڤربول مش هجيبوا صلاح بكل الفلوس دي علشان يقعد، ايه العمل؟

ج٣: من الناحية ده ما تقلقش، صلاح اصلا بيلعب دلوقتى مع روما اكثر بين الخطوط ده غير انه لعب مهاجم ثانى كثير و مهاجم اول شوية مع برادلي فى منتخب مصر و لعب برده ناحية الشمال، و الاهم من ده أن مانى اصلا بيلعب ناحية الشمال و ما اتنقلش يمين غير آخر موسمين بين السينتس و ليڤربول لكنه لعب كجناح شمال بين ميتز و ريدبول و السينتس فى اكثر من ١٠٠ ماتش.

•ده بالعكس كمان، ده وجود صلاح و مانى الاثنين اغلب الوقت فى الملعب هيبقى مهم جدا لان بنظرة موضوعية لفرقة ليڤربول فهى فرقة بتتميز بمهارات كبيرة فى المساحات الضيقة و فى الضغط العالى لكن عندها مشكلة فى السرعات و اللى صحيح مانى سد جزء كبير من المشكلة ده فور قدومه و ظهرت مرة ثانية فور إصابته بتحقيق ليڤربول  لـ ١٣ نقطة فى ١٠ ماتشات فى البريميرليج غاب فيهم  مانى قبل تغير الرسم الخططى فى اخر  ماتشين، لكن كان اغلب الاوقات مانى بيمثل هدف واحد لخصوم ليڤربول علشان يستهدفوه و يراقبوه فور انهم يفقدوا الكرة ده غير طبعا التزام مانى بأدواره الدفاعية فى مساندة الظهير، و ده اللى قلل بشكل كبير عدد الأهداف اللى ليڤربول سجلها لهدفين من مرتدات فى البريميرليج،  لكن فى وجود صلاح و مانى الاثنين فى الملعب على الخطين ده هيبقى كثير جدا على دفاعات الخصوم سواء فى المرتدات او فى اللعب المفتوح لانهم قادرين يوفروا وسع هايل للملعب يقدر بمساعدة تحركات فيرمينو يفتحوا تشانلز فى دفاعات الخصوم ويقدروا هم نفسهم بكل سرعتهم يضربوها او للقادمين من الخلف زى للانا و كوتينيو و ڤينالدوم.

س٤: طب ال٤٠ مليون يورو دول مش كثير؟

ج٤: يا اخى أنظر حولك .. مانشستر سيتى لسه شارى حارس برازيلى عنده ٢٣ سنة و لسه ما لعبش ولا ماتش دولى مع منتخب البرازيل الاول تقريبا ب٤٠ مليون برده مع انهم لسه شارين حارس الموسم اللى فات، فببساطة ٤٠ مليون يورو دلوقتى هى صفقة إنتقال متوسطة مش حتى كبيرة و صلاح كلاعب كرة بدون اى إعتبارات أخرى يستحقها و يمكن زياده.

وفي النهايه نتمنى للاعبنا المصري محمد صلاح النجاح في اي مكان يكون متواجد فيه ويوفق في ما هو قادم.
مجمع نيوز

مجمع نيوز

التعليقات
0 التعليقات

ليست هناك تعليقات:

إرسال تعليق

يتم التشغيل بواسطة Blogger.
جاري التحميل