من الذاكرة .. نجيب الرحاني و " الأربعة الكرام " | مجمع نيوز
اخر الاخبار
recent

من الذاكرة .. نجيب الرحاني و " الأربعة الكرام "

من الذاكرة .. نجيب الرحاني و " الأربعة الكرام "

من الذاكرة .. نجيب الرحاني و " الأربعة الكرام "



مقال " الأربعة الكرام " بقلم الأستاذ نجيب الريحانى نشر فى العدد الأول لمجلة الكواكب الصادرة عن دار الهلال فى 8 فبراير 1949 .
ليلى مراد :
----------
ليلى مراد الإنسانة وشها زى المراية يعبر دائماً عن نفسيتها .. وليلى مراد الفنانة ممثلة حساسة مالهاش نظير فى العالم .. ولو أنا منها كنت أحب التمثيل وأهتم بالتمثيل وأكون ممثلة وبس ، ولو أنها كمطربة ظريفة وعظيمة جداً . وأعتقد أن ده مش هيكون رأيى لوحدى ، إنما حيكون رأى الملايين اللى يشوفوها فى فيلم ( غزل البنات ) اللى مثلته معاها أخيراً .
محمد عبد الوهاب :
----------------
عبد الوهاب هو الرجل اللى قدر يغير ذوق الجمهور وجر فى ركابه كل موسيقيين عصره ونساهم الحاجات القديمة السقيمة . وبتطوره دع عمل ثورة فى الموسيقى ... والثورة دائماً بتعقبها نهضة .. وكمان عمل ثورة تانية فى نجيب الريحانى نفسه لدرجه أنه خلاه يغنى .. ومع مين ؟ مع ليلى مراد !! ربنا يستر ويجيب العواقب سليمة !!
يوسف وهبى :
------------
هو الفنان العظيم اللى عمل ثورة فى التمثيل زى ثورة عبد الوهاب فى الموسيقى ، لأنه بوجوده فى الوسط بصفته يوسف وهبى بن عبد الله باشا وهبى جعل الجرائد تهتم بالتمثيل ـ، بل صدرت مجلات خاصة خاصة بشئون التمثيل ، وإبتدأ الفن بكبر وتبقى له مكانته المحترمة الآن فى البلد .
ويوسف وهبى يعطى للزمالة حقها وما عندوش الغيرة الوحشة اللى كانت مانعة اشتغال الفنانين الكبار مع بعض وأكبر دليل على روحه الطيبة الطيبة هو إشتراكه معى فى فيلم غزل البنات .
أنور وجدى :
----------
أما أنور وجدى الشاب النشيط اللى كله ذكاء ـ والممثل المرح الخفيف الظل ، والفتى الأول للسينما المصرية بلا منازع ، ما كنتش أفتكر أنه فوق المميزات دى كلها فيه ميزة المخرج العظيم اللى غير نظرتى للسينما والسينمائيين ، أنا دائماً أبداً كنت أهاجم السينما وأقول إن مفيش عندنا مخرجين ، ولكن أنور بعد إخراجه لفيلم ( غزل البنات ) حببنى فى السينما وخلانى أعترف بنبوغه فى الإخراج .. وأرجو أن يستمر فى طريقه إلى الأمام وما يركبوش الغرور .
-----------------
Unknown

Unknown

التعليقات
0 التعليقات

ليست هناك تعليقات:

إرسال تعليق

يتم التشغيل بواسطة Blogger.
جاري التحميل